Інфармацыйныя матэрыялы былі распаўсюджаныя на памежным пераходзе «Белавежа – Перароў» паміж Польшчай і Беларуссю.
Кіраўнікі Беларускага Дома ў Варшаве Уладзімір Кобец і Алесь Зарамбюк разам з актывістамі ініцыятывы «Грамадзянская Гарадзеншчына» распавялі жыхарам беларуска-польскага памежжа аб малым памежным руху. Актывісты раздалі лісткі на памежным пераходзе ў Белавежскай пушчы, паведаміў у «Фэйсбуку» сустаршыня «Беларускага дома ў Варшаве» Алесь Зарамбюк.
«Вельмі невялікая колькасць беларусаў ведае аб малым памежным руху. Вось мы працуем з імі, размаўляем, расказваем, што ёсць гэтая дамова, што гэта дазваляе вам ездзіць без візы. Знаходзім вельмі шмат пазітыўных водгукаў – і ад беларусаў, і ад палякаў. Беларуска-польскае памежжа павінна быць бязвізавым, яно павінна мець малы памежны рух, і мы, суседзі здаўна, павінны кантактаваць, павінны гандляваць», – распавёў Зарамбюк у інтэрв’ю «Радыё Рацыя».
6 гадоў таму «палата прадстаўнікоў» і польскі Сэйм ратыфікавалі пагадненне аб малым памежным руху, што дазволіла б жыхарам сумежных тэрыторый Польшчы і Беларусі пераязджаць мяжу без візы.
Аднак Лукашэнка не захацеў паставіць свой подпіс і заблакаваў ужо падрыхтаваную пастанову.
артыкул – Радыё Рацыя
фота – Беларускі Дом