Запрашаем на прэзентацыю кнігі гісторыка Ігара Мельнікава “Верасень 1939-га. Магілы “неаб’яўленай” вайны”, якая адбудзецца 18 лістапада а 19:00 у Беларускім Доме ў Варшаве.
Ігар Мельнікаў – кандыдат гістарычных навук, магістр Варшаўскага Універсітэта, спецыяліст па вайсковай гісторыі Беларусі.
У кнізе “Верасень 1939-га. Магілы “неаб’яўленай” вайны” змешчаная інфармацыя пра польскія і савецкія вайсковыя пахаванні верасня 1939 года. У дадзеным выданні ўзгаданыя найбольш знакавыя вайсковыя і грамадзянскія пахаванні (а таксама абставіны гібелі людзей) пачатковага перыяду Другой сусветнай вайны ў Беларусі. У кнізе змешчаныя ўнікальныя здымкі з архіва аўтара, замежных і айчынных архіваў, а таксама фатаграфіі, якія паказваюць сучасны стан польскіх і савецкіх пахаванняў верасня 1939 года.
Асаблівая ўвага ў кнізе нададзеная аналізу сталінскіх рэпрэсій супраць так званага “польскага кантынгента” – грамадзян даваеннай Польшчы, якія пасля далучэння Заходняй Беларусі да БССР апынуліся на тэрыторыі Савецкага Саюза. Што такое “Беларускі катынскі спіс” і чые прозвішчы могуць апынуцца ў гэтым дакуменце? Каго дэпартавалі з заходніх абласцей БССР у 1940-1941 гадах? Хто стаў ахвярай жудаснай эвакуацыі турмаў з тэрыторыі савецкай Беларусі ў чэрвені 1941 года? Адказы на гэтыя пытанні чытачы таксама знойдуць у кнізе. Толькі гістарычная праўда і памяць дазволяць зразумець тыя няпростыя падзеі.
(Асобы, якія ўдзельнічаюць у мерапрыемстве, аўтаматычна згаджаюцца на выкарыстанне арганізатарам сваёй выявы на фотаздымках, зробленых падчас мерапрыемства для рэкламы дзейнасці Беларускага Дома)