Падчас сустрэчы ў Беларускім доме, якая адбылася 12 красавіка, жыхары Варшавы пазнаёміліся з магчымасцямі бязвізавага ўезду ў Беларусь. Мерапрыемства адбылося ў межах інфармацыйнай кампаніі па развіцці турыстычнага іміджу нашай краіны, якую праводзіць рэдакцыя Białoruś po polsku сумесна з беларускімі турфірмамі.
Удзельнікаў мерапрыемства пазнаёмілі і з працэдурай афармлення дакумента для бязвізавага ўезду, распавялі пра працэдуру абавязковай рэгістрацыі ў Беларусі і пра магчымасці рэзервацыі жылля, пра правілы карыстання сістэмай аплаты дарог Beltoll.
«Так, напрыклад, у Берасцейскім раёне ёсць вёска Тамашоўка з памежным пераходам да Украіны, – кажа Яўген Скрабутан, арганізатар мерапрыемства. – Аднак хоць яна і ўваходзіць у бязвізавую зону, а выехаць з Беларусі там можна толькі пры наяўнасці візы – пра такія нюансы інфармацыю ў польскамоўным інтэрнэце знайсці даволі складана. Альбо тая ж працэдура рэгістрацыі: дзе рэгістравацца турысту з уласным трэйлерам ці валацугу, якія прыехаў да нас пажыць у намёце на ўскрайку пушчы? Таму мы стварылі онлайн-інфацэнтр Białorus po polsku ў фэйсбуку і знаходзячыся ў Беларусі шукаем для патэнцыйных турыстаў адказы на часам даволі няпростыя пытанні».
Ад 1 студзеня 2018 года да турыстычнай зоны парку Аўгустоўскі канал і Гродна далучылася тэрыторыя Брэста і ваколіц, а таксама павялічыўся тэрмін іх бязвізавага наведвання да 10 дзён. А ўжо 27 ліпеня 2018 жыхары 74 краін атрымалі магчымасць прыляцець у Беларусь самалётам, і на працягу 30 дзён без візы падарожнічаць па краіне. Міністэрства спорту і турызму Беларусі прыкладае намаганні, каб завабіць замежных турыстаў, аднак інфармацыі пра бязвізавыя магчымасці пакуль недастаткова.