У гэты няпросты для ўсіх беларусаў час на вялікі жаль з’яўляюцца махляры, якія карыстаюцца няшчасцем беларусаў для сваіх мэтаў. Беларускі Дом звяртаецца да ўсіх пацярпелым ад рэжыму беларусаў з просьбай быць больш уважлівымі!
Апошнім часам да нас пачалі даходзіць паведамленні, што адзін акаунт у Instagram сцвярджае, што ён звязаны з Беларускім Домам і прадастаўляе паслугі па адкрыцці польскіх гуманітарных візаў, што з’яўляецца няпраўдай.
“Нужно лишь сбросить им свои документы, а если хотим гуманитарную визу, то развернутое письмо, в котором описаны все наши опасения и риски, связанные с дальнейшим пребыванием в Беларуси во всех подробностях.Утверждают, что сотрудничают с Беларуским Домом в Варшаве.”
У сувязі з гэтым, мы заклікаем Вас:
- Абавязкова правярайце, каму Вы дасылаеце свае дадзеныя
- Калі Вы хочаце атрымаць дапамогу ці параду ад нейкай польскай арганізацыі, Вы можаце спачатку праверыць, ці яна афіцыйна зарэгістравана: ekrs.ms.gov.pl
- Праверыць адрас email і тэлефон, па якому вы звязваецеся – ці ёсць ён на афіцыйнай старонцы www і ці пазначаны ў сацыяльных сетках
- Можна таксама праверыць ці супадае адрас пазначаны на сайте з афіцыйным
Такім чынам мы праверылі і PL_visa_BY, якія сцвярджаюць, што яны польскі фонд, які дапамагае беларусам:
- нумар тэлефона, які ў іх пазначаны для кантактаў – належыць Амбасадзе Украіны ў Варшаве
- адас у Варшаве – таксама адпавядае адрасу украінскай Амбасады
Такім чынам мы настойліва просім усіх пацярпелых беларусаў не дасылаць дадзеныя сваіх дакументаў, апісанне сваіх гісторый затрыманняў і рэпрэсій невядомым махлярам у інтэрнэце.
Для таго, каб адкрыць гуманітарную візу Вам не патрэбныя ніякія агенты ці пасярэднікі. Уся інфармацыя размешчана на афіцыйным сайце польскай Амбасады ў Беларусі, згодна з якой трэба звязацца па тэлефоне альбо электроннай пошце з адным з консульстваў Польшчы ў Беларусі:
- Консульскі аддзел Рэспублікі Польшча ў Рэспубліцы Беларусь – тэл.: +375 17 388 52 49, e-mail: minsk.wk.wizy@msz.gov.pl, альбо
- Генеральнае консульства Рэспублікі Польшча ў г. Брэсце – тэл.: +375 162 27 00 49, e-mail: visabrest@msz.gov.pl, альбо
- Генеральнае консульства Рэспублікі Польшча ў г. Гродна – тэл.: +375 152 73 10 49, e-mail: grodno.kg.wiza@msz.gov.pl
Візавую анкету можна падаць непасрэдна ў консульстве альбо ў адным з візавых цэнтраў на тэрыторыі Беларусі без папядняй онлайн рэгістрацыі.
Для атрымання візы неабходна падаць наступныя дакументы:
- запоўненую і падпісаную візавую анкету с фотаздымкам;
- сапраўдны пашпарт, выдадзены на працягу апошніх 10 год, у якім ёсць дзве свабодныя старонкі, тэрмін дзеяння якога заканчваецца не раней, чым праз 3 месяцы пасля заканчэння тэрміну дзеяння візы;
- медыцынскую страхоўку на тэрмін, на які вы хочаце атрымаць візу,
- а таксама пісьмовую заяву аб жаданні атрымаць візу ў Польшчу.
Віза бясплатная. Калі вы будзеце падаваць дакументы ў візавым цэнтры, вам неабходна будзе аплаціць паслугі цэнтра – суму ў памеры 11 еўра.
Калі ў Вас ёсць нейкія пытанні па тэму гуманітарнай візу, звяртайцеся непасрэдна ў Консульства, альбо за парадамі ў Беларускі Дом у Варшаве:
- Telegram – @belaruskidom2020
- dapamoga2020@gmail.com
Акрамя гэтага у інфармацыйным дапаможніку Беларускага Дома Вы можаце знайсці адказы на пытанні на тэму гуманітарнай візы.