У незалежнасці ад таго, якая праца ў Польшчы вас зацікавіла, на пачатковым этапе кандыдатаў судзяць толькі па CV: права на сумоўе і асабістую сустрэчу з працадаўцам яшчэ трэба заслужыць. Як? Сабралі для вас некалькі парад.
Фармат і афармленне
Памятайце, у Польшчы няма «рэзюмэ» − толькі CV (ад лацінскага Curriculum Vitae, жыццяпіс).
DOC і PDF − самыя распаўсюджаныя фарматы. Ідэальная назва файла: CV − ніжняе падкрэсліванне − імя − прозвішча. Напрыклад: CV_Ales_Dashkevich.pdf
Пішыце пра сябе сцісла і дынамічна − старонкі А4 будзе дастаткова.
Фотаздымак
Не забудзьцеся на добрае фота! Сустракаюць, як вядома, па вопратцы. Здымак мусіць адпавядаць класічным патрабаванням.
Асабістыя дадзеныя (Dane personalne)
Імя і прозвішча (imię i nazwisko) пішам лацініцай, як у пашпарце.
Email − гэта таксама элемент самапрэзентацыі, таму абавязкова стварыце скрыню на міжнародным паштовым сэрвісе, накшталт gmail. Напрыклад, a.dashkevich @gmail.com, дзе «a» − першая літара імя.
З тэлефонам, адрасам і датай нараджэння, быццам, усё зразумела.
Адукацыя (Wykształcenie)
Напішыце пра сваю адукацыю з апошняга месца вучобы.
Слоўнік у дапамогу:
- сярэдняя адукацыя − wykształcenie średnie
- вышэйшая адукацыя − wykształcenie wyższe
- бакалаўр − licencjat
- дыпламаваны спецыяліст − dyplomowany specjalista
- ступень магістра/магістр − magister
- спецыялізацыя − specjalizacja, kierunek
- агульнаадукацыйная школа − liceum ogólnokształcące
- гімназія − gimnazjum
- тэхнікум − technikum
- школа прафесійнага навучання, пачатковая, сярэдняя, вячэрняя – szkoła zawodowa, podstawowa, średnia, wieczorowa
Вопыт работы (Doświadczenie Zawodowe)
Месцы працы таксама пазначайце ў адваротным храналагічным парадку. Што істотна? Дзе і колькі часу вы працавалі, на якой пасадзе, якія выконвалі абавязкі. Памятайце: калі ўладкоўваецеся ў IT-офіс, не абавязкова пісаць пра тое, як калісьці ў студэнцтве вы працавалі касірам у краме.
Навыкі (Umiejętności)
Падбірайце навыкі пад тую працу, якую хочаце атрымаць. Будаўніку наўрад ці спатрэбіцца дасканалае веданне Microsoft Office. Намёк зразумелі?)
Хобі і захапленні (Zainteresowaniа)
Калі вы проста любіце паслухаць музыку ці пачытаць, то лепш прапусціце гэты блок. Аднак, калі вы гуляеце ў валейбол − абавязкова пішыце! Карпаратыўны дух, dream-team і ўсё такое…
Замежныя мовы (Znajomość języków obcych)
Ці проста języki obce. Як гучаць ўзроўні валодання мовай на польскай?
- родны ojczysty
- пачатковы − podstawowy
- прасунуты − zaawansowany
- на камунікатыўным узроўні − komunikatywny
Можаце выкарыстоўваць і міжнародную класіфікацыю A/B/C + лічбы 1/2. Такі варыянт падыдзе для тых, хто дакладна ведае свой узровень або скончыў адпаведныя моўныя курсы.
Абавязкова! Дайце свой дазвол на апрацоўку асабістых дадзеных, інакш ваша CV не будзе разгледжана – “Wyrażam zgodę na przetwarzanie moich danych osobowych przez (nazwa firmy) w celu prowadzenia rekrutacji na aplikowane przeze mnie stanowisko”.
Поспехаў у працаўладкаванні!